Maca jaman

Maca jaman

 dening : Melanti Rizkiyah

Jaman-jaman pungkasan

Wong-wong sarwa kedanan

Jaman-jaman pungkasan

Ora ngedan ora keduman

Jaman-jaman pungkasan

Darat-darat wiwit keleban

Jaman-jaman pungkasan

Prawan-prawan padha babaran

Jaman-jaman pungkasan

Urip bebrayan padha cokot-cokotan

Jaman-jaman pungkasan

Daging babi dianggep sapi

Jaman-jaman pungkasan

Agama kelangan aji

Jaman-jaman pungkasan

Menungsa kelangan ati

Jaman-jaman pungkasan

Wong keblinger mbalik mangetan

Jaman-jaman pungkasan

Suling pati enggal kaleksanan

Durung kober dakgurit

Durung kober dakgurit

dening : Melanti Rizkiyah

Durung kober dakgurit

Kahanan brubahing negara

Durung kober dakgurit

Kutha gedhe keleban runtah

Durung kober dakgurit

Bocah cilong ora bisa mangan

Durung kober dakgurit

Panguwasa brubah  dadi lintah

Durung kober dakgurit

Anak pejabat nggiles rakyat

Durung kober dakgurit

Wong mlarat kakehan srakat

Durung kober dakgurit

Aku ora kuwat

Tanpa apa

Tanpa apa

dening : Melanti Rizkiyah

anta tanpa rasa

ilang tanpa ujud

ijen tanpa kanca

ligan tanpa wrangka

selak tanpa rumangsa

legena tanpa sandhangan

tetep tanpa owah

wutuh tanpa suda

dadakan tanpa antan-antan

gabug tanpa isi

grumpung tanpa irung

tukung tanpa buntut

prucul tanpa sungu

 blarah tanpa aturan

cuthel tanpa terusan

Gambar tanpa Pigura

Gambar tanpa pigura

dening : Melanti Rizkiyah

Gambar lawas sakeh lebu

Kapasang tanpa pigura

Wong wadon ayu satengah ngguyu

Ana sajroning

Gambar lawas sakeh lebu

Kapasang tanpa pigura

Abadi tumemplek

ana tembok ruwang tamu

gambar lawas sakeh lebu

kapasang tanpa pigura kae

ngendikane simbah iku sibu

lawas sowan maring Gusti

gambar lawas sakeh lebu

kapasang tanpa pigura

dadi pepagutan netra

Aku nggurit ing banyu

Aku nggurit ing banyu

dening : Melanti Rizkiyah

Sawangen gaweku

Nalika aku nggurit ing banyu

Wong-wong sarwa ngguyu

Sawangen gaweku

Nalika aku nggurit ing banyu

Akal pikir ora ketemu

Indonesia

Indonesia

dening : Melanti Rizkiyah

Indonesia misuwur

 Cinarita bab luhur makmure

Indonesia misuwur

Cinarita bab ayem tentreme

Indonesia misuwur

Pamong prajane tansah nyawiji

Indonesia misuwur

Lemah subur gembur

Indonesia misuwur

Ulam teka tanpa jaring

Indonesia misuwur

Papan adhem tanpa prahara

Indonesia misuwur

Lemah dikeruk, emas saloka

Nanging ana kene

Ana papan pinggiring praja

Kabeh mau miturutku amung pulasan

Sabab

Papanku papan amba tanpa gedheg

Lampuku lampu padhang lintang johar

Kemulku akemul pedhut kandel lingsir wengi

Kaya-kaya crita mau

Tumprap Indonesia ing papan liya

Nanging ana ngendi papane?

Aku dhewe ora ngerti

Babu manca

Babu manca

dening : Melanti Rizkiyah

Adoh panggon saka asalku

Tanpa kadang tanpa sanak

Dadi babu golek kamulyan

Dadi babu

Babu manca

Babu bodho ora bisa apa-apa

Babu manca

Dianggep dudu menungsa

Babu manca

Urip tansah kasiya-siya

Babu manca

Golek dhuwit

Totohan pati

Babu manca

Ora dianggep marang negara

Babu manca

Mesakna

Grobag Runtah

 Grobag Runtah

dening : Melanti Rizkiyah

Sadina-dina

Uripku

Amung ndhorong grobag

Nanging dudu grobag

 isi cacahan daging bunder

dudu grobag

isi ronde

dudu grobag

isi bubur lan sakwarnane

grobagku grobag tuwa

grobagku grobak runtah

ambu banger tansah semriwing

kewan laler tansah ngiter

sok-sok malah ana uler singgat

ugat-uget ana grobagku

kanggoku

kabeh mau ora dadi ngapa

tinimbang dadi pejabat

kadya uler singgat ana grobag

mbrakoti daginge wong papa

Ngoyak Layangan

Ngoyak Layangan

dening : Melanti Rizkiyah

Cahyane srengenge awan iki

Banget ngenthak-ngenthak

Nanging bocah lanang cacah telu

Mlayu-mlayu ngawasi ndhuwur

Panguwasa angkasa

Kang kagawe saka dluwang

Nembe wae kaprajaya

Dening mungsuhe

Raga tanpa daya

Kagawa pasrah karo playune angin

Bocah lanang nomer telu

Kanthi langkah cekat-ceket

Nggayuh benang praja

Kasigeg playune raga tanpa daya

Tandha juwara sayembara

Pasar Pahing

Pasar pahing

dening : Melanti Rizkiyah

Pedhut  klawu

Nggubeng sakupenge dhusun

Nadyan dina isih pajar

Nadyan hawa adhem njalari asrep

Pawongan kemulan sarung

Padha mlaku iring-iringan

Bebarengan

Tumuju pasar pahing

Ana pucuking  dhusun

Wis rame pawongan

Wis rame dagangan

Samubarang samapta

Pasar kang binukak seminggu pisan

Dadi tujuning utama

Keduwung

Keduwung

dening : Melanti Rizkiyah

          Sumitra..rungokna apa kang dadi sambatku

          Nalika semana

          Cilikanku gembeng

          Bapak  biyen duka

          Merga aku ora gelem sinau

          Biyung nangis nggugu mikiri aku

          Simbah wis ora pagah

          Saiki aku susah sumitra

          Urip tanpa rasa bungah

          Urip tanpa panggayuh

          Sumitraku..nalika awakmu lungkrah

          nggayut lintang

          sawanga aku ana mburi

          kamangka awakmu  bakal  wurung

          ngandheg jangkahmu

          Terusa mlaku

          Tanpa kendhat

          Tanpa sumelang

Segara regedan

Segara regedan

dening : Melanti Rizkiyah

          Sing disawang amung regedan

          Urip manungsa sansaya ngedan

          Karepe sing sarwa instan

          Sing ditemoni amung runtah kagawa ombak

          Wungkus-wungkus plastik tanpa itungan

          Pating slerah ana pinggiring segara

          Segara segara tanpa rupa

          Merga segara, segara regedan

         

Aja diparengake

Aja diparengake

dening : Melanti Rizkiyah

          Aja diparengake kupu nangis

          Aja diparengake manuk-manuk ndhekuku

          Aja diparengake ilining banyu asat

          Aja diparengake angin ngandheg playune

          Aja diparengake lemah gundul tanpa tanduran

          Aja diparengake tangis bayi pecah

          Mbeset awang-awang

          Aja diparengake wong tuwa kelangan sembada

          Aja diparengake jerit wong luwe kaprungu

          Aja diparengake  wong lara kentekan obat

          Aja diparengake wong mlarat

          Ora kajatah papan

          Aja diparengake wong papa

          Ora kasambat

          Aja diparengake wong mati ora karumat

          Aja diparengake lintah nyedhot getihing lembu

         

Lingsir Wetan

Lingsir wetan

dening : Melanti Rizkiyah

                   Wayahe lingsir wetan

                   Biruning mega katon pepak

                   Cahyaning putih wis kumlebat

                   Surya metu saka andhongane

                   Tetesing embun wiwit sirna

Manuk prenjak suka pirena

                   Pating cruit

                   Pitik cilik gorek ing lemah

                   Wayahe lingsir wetan

                   Ayo padha tumandang

                   Ngalap berkahing kang Gusti Maha Pesthi

Pagah

Pagah

dening : Melanti Rizkiyah

                   Tansah pagah

                   Nadyan dalan sing dak liwati ora gampang

                   Tansah pagah

                   Nadyan ing tengahing aspal tanpa sandhal

                   Tansah pagah

                   Nadyan eri mbeset kulit

                   Tansah pagah

                   Nadyan tumetesing luh sansaya deres

                   Tansah pagah

                   Nadyan jangkah iki keraya-raya

                   Tansah pagah

                   Nadyan ati keranta-ranta

                   Tansah pagah

                   Tansah percaya

                   Awak iki isih duwe Gusti

         

Pratandha

Pratandha

dening : Melanti Rizkiyah

                   Sanyatane pratandhane wis teka

                   Nalika rikma manglih ing warna

                   Nalika kulit kelangan serete

                   Nalika waja wiwit suda

                   Nalika raga banget ringkihe

                   Sejatine iku pratandha

                   Srengenge bakal mangslup

                   Dina bakal sirna

                   Peteng kang bakal nggubet

                   Kanggo mripat kang wis katutup

                   

Wengi

          Wengi

dening : Melanti Rizkiyah

         

                    Wengi iki wengiku

                   Nalikane pawongan wis padha turu

                   Wengi iki duweku

                   Nalika playune angin sansaya keprungu

                   Wengi iki amung kanggo aku

                   Nalika ana banyu sinuntak saka awang-awang

                   Gumrujug

                   Gumleger

                   Kodhok bangkong jejingklakan bungah

Manuk-manuk tutupan godhong

Wengi iki

                   Wengi anyep  nentremke ati

                   Nalikane eling marang Sang Hyang Widhi

Kidung Katresnan

Kidung katresnan

dening : Melanti Rizkiyah

Lumantar ungeling  kidung katresnan

Ingkang manjing ing penggalih

Angemba busananing prameswari

Tinon saking mandrawa

Galebyar pating calorot kadya kilat asesiring

Arum angambar-ambar gandhaning burat sari

Tumapaking nut tumataning babut prangwedani

Lon-lonan rerepeh-rerepeh

Satemah dadya sumawur kang sekar setaman

Rasa bungah nyusup ngebaki sela-selaning galih

Nalika dhaup karo pepujaning ati

Tri prakara kang tan kena kapurba

Dening panguwasaning manungsa

Dalan iki

Dalan iki

dening : Melanti Rizkiyah

                   Prasasat tan kendhat

                   Anggonku lumampah ana dalan krakal iki

                   Laraning cagak awak tanpa rasa maneh

                   Kabeh mau merga tresnaku

                   Obormu kang makantar-kantar

                   Madhangi jangkah lan jagatku

                   Nanging saiki

                   Ana ngendi papanmu

                   Aku dewe ya ora ngerti

                   Kadya ceplik kasirep angin

                   Peteng dalan iki

Sugeng Tanggap Warsa

Sugeng Tanggap Warsa

dening : Melanti Rizkiyah

Tumuju ing wayah lingsir wengi

Aditya wus sumurup ana ing andongane

Kaganti dening lintang kang padha gumebyar ana ing langit

Emprit sing padha nggegurit

Prenjak kang padha semanak

Guyune kupu, tangise kinjeng wis ora keprungu

Kijolan kaliyan

Jangkrik-jangkrik kang padha ngerik

Swara jam kang kaya kaya tambah seru anggone muter

Sepi ing rina wengi

Nggegiring dina iki tumuju esuk kang luwih ngajeni

Esuk kang luwih dumadi

Ing tengah wanci iki

Yuswamu katambahan sakwarsa

Sugeng tanggap warsa

 hanamung lantaran guritan ora sepiro

Mugia kabagas warasan tansah kaparingaken marang sliramu

Mugio gampang gangsaring ngaurip tansah angiringi lakumu